ЖАСТАРҒА СЫБАЙЛАС ЖЕМҚОРЛЫҚҚА ҚАРСЫ ДӘРІС ОҚЫЛДЫ

Ағымдағы жылдың 2 қарашасында Қазақстанның инновациялық және телекоммуникациялық жүйелер университетінде жастардың құқықтық мәдениетін арттыруға бағытталған мазмұнды кездесу өтті.

«ЖАҢАРУ» Сыбайлас жемқорлыққа қарсы жалпыұлттық қозғалыс» РҚБ Батыс Қазақстан облыстық филиалының ұйымдастыруымен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында арнайы дәріс оқылды.

Дәрісті «ЖАҢАРУ» жалпыұлттық сыбайлас жемқорлыққа қарсы қозғалысы» РҚБ Батыс Қазақстан филиалының төрағасы Айтимов Ақсерік Сарыұлы оқыды. Тақырыбы – «Жастардың құқықтық тәрбиесі – сыбайлас жемқорлыққа қарсы дүниетанымның негізі».

Іс-шараға мемлекеттік органдардың өкілдері, қоғамдық ұйымдардың белсенділері, университет оқытушылары мен студент жастар қатысты.

Дәріс барысында жастар үшін ең өзекті мәселелер қозғалды:

Құқықтық мәдениетті қалыптастыру: Заңды тек білу емес, оны күнделікті өмірде қолдану және құрметтеу.

Құқықтық сауаттылықты арттыру: Өз құқықтары мен міндеттерін білу, сыбайлас жемқорлық жағдайында қалай әрекет ету керектігін түсіну.

Сыбайлас жемқорлықты қабылдамау: Жемқорлықтың кез келген көрінісіне «нөлдік төзімділік» қағидатын қалыптастыру.

Спикер өз сөзінде азаматтық жауапкершіліктің, адамгершілік қағидаттарының, адалдық пен әділдіктің әр адамның өміріндегі маңызына ерекше тоқталды. «Сыбайлас жемқорлық – бұл тек экономикалық қылмыс емес, бұл – қоғамның моральдық негізіне төнген қауіп. Онымен күрес пара алған адамды жазалаудан емес, адалдықты, заңдылықты және жауапкершілікті өмірлік ұстанымы ретінде қабылдайтын тұлғаны қалыптастырудан басталады», - деп атап өтті А.С. Айтимов.

Қатысушылар мемлекеттік институттар мен азаматтық қоғамның сыбайлас жемқорлыққа қарсы сананы қалыптастырудағы, заңдылық қағидаттарын нығайтудағы және жастардың құқықтық мәдениетін арттырудағы рөлін жан-жақты талқылады.

Қорытындылай келе, жастардың құқықтық тәрбиесі – бұл Қазақстанның жарқын болашағы мен әділетті қоғамның қалыптасуына қосар ең маңызды үлес екені атап өтілді.

«ЖАҢАРУ» РҚБ Баспасөз қызметі