Қарағанды индустриялық университетінде «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында жастарға арналған курс өтті. Іс-шараны «ЖАҢАРУ» Сыбайлас жемқорлыққа қарсы жалпыұлттық қозғалыс» РҚБ-нің Қарағанды облыстық филиалы ұйымдастырды. Курсты Қарағанды индустриялық университетінің комплаенс-қызметінің басшысы Самал Ибрагимова жүргізді.
   Курстың мақсаты – жастардың құқықтық сауаттылығын арттыру, сыбайлас жемқорлыққа қарсы сана-сезімін қалыптастыру, «Заң мен тәртіп» қағидатын өмірлік ұстанымға айналдыру және адал, парасатты, әділ ұрпақ тәрбиелеу.
   Іс-шара барысында қатысушылар: өз құқықтары мен міндеттерін білудің маңыздылығын; сыбайлас жемқорлықтың қоғамға тигізетін зиянын; сыбайлас жемқорлыққа қарсы тұрудың құқықтық жолдарын; «Заң мен тәртіп» қағидатының күнделікті өмірдегі рөлін жан-жақты талқылады.
   Сабақ дәстүрлі дәріс түрінде емес, тренинг, интерактивті сабақ және ашық пікірталас форматында өтті. Бұл формат жастарға тек теориялық білім алып қана қоймай, нақты өмірлік жағдайларды (кейстерді) талдауға, өз пікірін ашық білдіруге, көкейдегі сауалдарына жауап алуға мүмкіндік берді.
   Студенттер белсенділік танытып, өз ойларын ортаға салды және сыбайлас жемқорлықсыз болашақ – өз қолдарында екенін атап өтті. Қатысушылар QR код арқылы сауалнамаларға жауап берді, алған білімдерін бекіту мақсатында жадынамалар таратылды.
   Бүгінгі курс көрсеткендей, сыбайлас жемқорлықпен күрестің ең тиімді жолы – білімді, саналы және әділ жасты тәрбиелеу. Өз құқығын білген, заңды құрметтеген жастар ғана парасатты қоғам құра алады.