2026 жылы 15 қазанда «Заң мен тәртіп» қағидаты аясында және «Жастарды құқықтық тәрбиелеу – сыбайлас жемқорлыққа қарсы дүниетанымның негізі» тақырыбында Тараз қаласындағы Шерхан Мұртаза атындағы №30 мектеп-гимназиясында жоғары сынып оқушыларына, ата-аналарға және білім беру ұйымдары директорларының құқықтық тәрбие ісі жөніндегі орынбасарларына арналған курс өтті.
   Курс барысында білім беру ұйымдарындағы профилактикалық кеңестердің жұмысын ұйымдастыру, кәмелетке толмағандар арасындағы құқық бұзушылықтың алдын алу және жастардың сыбайлас жемқорлыққа қарсы дүниетанымын қалыптастыру мәселелері талқыланды.
   Жиналғандар алдында: Жамбыл облысының Бала құқықтары жөніндегі өңірлік уәкілі Дәурен Орайұлы Бағжанов, «ЖАҢАРУ» сыбайлас жемқорлыққа қарсы жалпыұлттық қозғалысы РҚБ Жамбыл облыстық филиалының директоры Қасымхан Естемесұлы Төлендиев, Тараз қалалық білім бөлімінің басшысы Әйгерім Аханқызы Алтынбаева, Тараз қаласы ПБ Қоғамдық қауіпсіздік басқармасы ювеналды полиция бөлімінің бастығы, полиция подполковнигі Шакизат Шаяхметқызы Юсупова, Тараз қалалық ата-аналар комитетінің төрайымы, қалалық қоғамдық кеңестің мүшесі Ғалия Орынбайқызы Рысбаева баяндама жасады.
   Курстың ең әсерлі бөлігі – кәмелетке толмағандардың қылмысы мен оның ауыр зардаптары туралы «Дарина» атты бейнероликтің көрсетілуі болды. Бейнеролик жоғары сынып оқушылары мен ата-аналар арасында қызу талқы тудырды. Талқылау барысында №34 орта мектеп директорының құқықтық тәрбие ісі жөніндегі орынбасары Зарина Үмбетбаева «Иә / Жоқ» форматындағы ой бөлісу алаңын жүргізді. Бұл бөлімнің мақсаты – құқықтық тәрбиеге қатысты өзекті сұрақтар төңірегінде пікір алмасып, оқушылардың көзқарастарын саралау және ортақ шешімге келу болды.
   Сонымен қатар Ы.Алтынсарин атындағы №49 мектеп-гимназия директорының тәрбие ісі жөніндегі орынбасары Тоғжан Момынжанова сөз сөйлеп, өз тәжірибесімен бөлісті.
   Курсты қорытындылаған Тараз қаласы білім бөлімінің басшысы Әйгерім Аханқызы Алтынбаева бүгінгі кездесуде айтылған барлық баяндамалар мен ұсыныстардың ортақ мақсатқа – оқушылар үшін қауіпсіз әрі қолайлы орта қалыптастыруға, құқық бұзушылық пен сыбайлас жемқорлықтың алдын алуға бағытталғанын атап өтті. Курс барысында Әйгерім Аханқызы жоғары сынып оқушыларымен ерекше жұмыс жүргізді. «Дарина» бейнеролигін талқылау кезінде үнсіз отырған балаларға «Сенің пікірің қандай?», «Бейнероликтен не түсіндің?», «Оның орнында болсаң не істер едің?», «Ондай жағдайға түспеу үшін не істеу керек?», «Бала қанша жастан қылмыстық жауапкершілікке тартылады?» деген сұрақтар қойып, ашық диалог алаңына айналдырды. Нәтижесінде қол көтеріп, пікір білдіргісі келген оқушылардың саны артты. Бұл бөлім қала мектептерінен келген тәрбие ісі жөніндегі орынбасарлар үшін нағыз мастер-класс болды.
   Іс-шара соңында заң мен тәртіпті құрметтеу, бала құқықтарын қорғау және жас ұрпақты тәрбиелеуге жауапкершілікпен қарау – баршамызға ортақ міндет екені айтылып, белсенді қатысқан барлық спикерлерге, ата-аналарға және жоғары сынып оқушыларына алғыс білдірілді. Сондай-ақ, қаланың барлық мектептерінде осындай құқықтық курстарды тұрақты түрде ұйымдастыру ұсынылды.