2026 жылғы 7 қыркүйекте І. Жансүгіров атындағы Жетісу университетінің Құқық және экономика факультетінде «ЖАҢАРУ» РҚБ-мен бірлескен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында «ЖАҢАРУ» РҚБ-гі ұйымдастырумен ата-аналармен кездесу өтті. «Құқық бұзушылық пен сыбайлас жемқорлықтың алдын алу» тақырыбын қамтыған жиынға студенттердің ата-аналары қатысты.
   Мақсаты – студенттердің құқықтық сауаттылығын арттыру, құқық бұзушылықтардың алдын алу, сыбайлас жемқорлыққа қарсы мәдениетті қалыптастыру, сондай-ақ жастар тәрбиесіндегі отбасы мен жоғары оқу орны арасындағы өзара ынтымақтастықты нығайту.
   Кездесудің басты спикері ретінде «ЖАҢАРУ» РҚБ-гі облыстық филиал директорының орынбасары, І. Жансүгіров атындағы Жетісу университетінің Құқық және экономика факультетінің деканы Телеуев Ғалым Байғазыұлы сөз сөйледі. Өз сөзінде спикер бүгінгі таңдағы жастар арасында құқық бұзушылық пен сыбайлас жемқорлықтың алдын алу, құқықтық мәдениетті қалыптастыру және академиялық адалдық қағидаттарын сақтаудың маңыздылығына тоқталды. Сонымен қатар студенттердің құқықтық тәрбиесінде ата-аналар мен университет арасындағы тығыз ынтымақтастықтың қажеттілігін атап өтті.
   «Болашақ заңгерлерді даярлауда кәсіби біліммен қатар адалдық, әділдік және заңға құрмет құндылықтарын қалыптастыру – басты міндеттеріміздің бірі. Құқық бұзушылық пен сыбайлас жемқорлықтың алдын алу тек университеттің ғана емес, ата-аналар мен жалпы қоғамның ортақ жауапкершілігі. Сондықтан жастардың құқықтық санасын арттыру бағытындағы бірлескен жұмыстарды жүйелі түрде жалғастыру маңызды», – деген ойды жеткізді. Сондай-ақ факультет деканы студенттердің құқықтық жауапкершілігін арттыру, тәртіпті сақтау және сыбайлас жемқорлыққа төзбеушілік мәдениетін қалыптастыру бағытындағы тәрбиелік жұмыстардың алдағы уақытта да жалғасатынын атап өтті.
   Кездесу барысында «Құқықтану» білім беру бағдарламасының 1-курс студенті Сансыбаева Ақсүйріктің анасы Молдашева Жамиля Нұрланқызы сөз сөйлеп, жастардың құқықтық тәрбиесінде отбасы мен университеттің өзара ынтымақтастығы маңызды екенін атап өтті. Ол болашақ заңгерлерді адалдыққа, әділдікке және заң талаптарын құрметтеуге тәрбиелеу қажеттілігіне тоқталып, осындай кездесулерді ұйымдастырушыларға алғысын білдірді.
   Сонымен қатар студент Ибраев Дамирдің анасы Имашева Айкөркем жастар арасында құқық бұзушылық пен сыбайлас жемқорлықтың алдын алуда ата-аналардың жауапкершілігі ерекше екенін атап өтті. Ол студенттердің құқықтық сауаттылығын арттыру, академиялық адалдық қағидаттарын сақтау және қауіпсіз білім беру ортасын қалыптастыру бағытындағы жұмыстарды қолдайтынын жеткізді.
   Іс-шара қорытындысында құқық бұзушылық пен сыбайлас жемқорлықтың алдын алу бағытындағы жұмысты жүйелі түрде жалғастырудың, сондай-ақ университет пен ата-аналар арасындағы өзара байланысты нығайтудың маңыздылығы атап өтілді. Мұндай кездесулер жастардың құқықтық санасын дамытуға, адалдық пен жауапкершілік құндылықтарын орнықтыруға және сыбайлас жемқорлыққа төзбеушілік мәдениетін қалыптастыруға бағытталған.