Ағымдағы жылдың 16-қыркүйегінде Жамбыл облысының Тараз қаласындағы Жақсылық Үшкемпіров атындағы «Тараз-Арена» спорт сарайында «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты жоба аясында Дене мүмкіндігі шектеулі адамдарға арналған спорт клубының ұжымы, 72 спортшысы қатысқан спорттық шара өтті.
   Спорттық шараны Жамбыл облысы әкімдігінің Дене мүмкіндігі шектеулі адамдарға арналған спорт клубының басшысы Жолдасбеков Нұржан Қырықбайұлы кіріспе сөз сөйлеп ашып, жүргізіп отырды.
   Жиында «ЖАҢАРУ» сыбайлас жемқорлыққа қарсы жалпыұлттық қозғалыс» РҚБ Жамбыл облыстық филиалының төрағасы, облыстық ардагерлер кеңесі төралқасының мүшесі Төлендиев Қасымхан Естемесұлы тақырып бойынша қысқа баяндама жасады.
   Шарада сондай-ақ Қазақстан Республикасы Мемлекеттік қызмет істері агенттігі Жамбыл облысы бойынша департаментінің Сыбайлас жемқорлықтың алдын алу басқармасының бас маманы Жылысбаев Ернар Нұрболұлы, облыс әкімдігінің балалардың құқықтарын қорғау басқармасының басшысы Мырза-Ғали Эльмира Иниятқызы, Сурдлимпиада ойындарының күміс және қола жүлдегері Тұрғынбай Ғасырдың анасы, «Әділет» партиясының Жуалы аудандық филиалының төрағасы Әбілдаева Гүлнара Жақсылыққызы және Дене мүмкіндігі шектеулі адамдарға арналған спорт клубының спортшылары атынан - Пара пауэрлифтингтен Әлем чемпионатының төрт дүркін күміс жүлдегері Қанатбек Санжар Ғазизбекұлының сөз сөйлеп, спортшылардың бәрі сыбайлас жемқорлыққа қарсы екенін айтып, жастарды адалдыққа, әділдікке, Әділетті Қазақстанды бірге құруға шақырды.
   Іс-шараның екінші бөлімінде Сурдо таеквондодан пумсе көрінісі көрсетіліп, қатысушылар арасында төрт спорт түрінен жарыс ұйымдастырылды: Пара армрестлинг жарысы; Пара пауэрлифтинг жарысы; Пара, Сурдо үстел теннисі жарысы; Пара бочча жарысы ұйымдастырылды.
   Қорытындысында қатысушыларға Сертификаттар тапсырылды. Спорттық шара өте қызық, тартысты өтті.
   Сыбайлас жемқорлықпен күрес - тек мемлекеттік органдардың немесе құқық қорғау саласының ғана міндеті емес. Бұл – қоғамның әрбір мүшесіне қатысты мәселе. Адал еңбек ету, өз міндетіңді жауапкершілікпен орындау, заң талаптарын сақтау, өзгенің құқығы мен еңбегін құрметтеу – сыбайлас жемқорлыққа қарсы мәдениетті қалыптастырудың негізі.
   Осы тұрғыдан алғанда, спорттың тәрбиелік маңызы ерекше деп есептейміз. Өйткені спорт адамды тәртіпке, төзімділікке, еңбекқорлыққа және жауапкершілікке тәрбиелейді. Спортшы жеңіске жету үшін күн сайын қатты еңбектенеді, жаттығады, жарыс ережесін сақтайды және қарсыласына құрметпен қарайды.
   Яғни, спорттағы әділдік – өмірдегі адалдықтың бір көрінісі.
   Спортшы жарыс кезінде жеңіске жету үшін ешкімді алдамайды, ережені бұзбайды, өз еңбегіне адал және оған сенеді. Осы қағиданы өмірде де ұстану қажет.
   Еліміздің көк байрағы халықаралық ареналарда әрдайым биікте желбірей берсін! Әділетті Қазақстанды бірге құрайық!