02.07.2025
Жемқорлықпен күресте қоғам мен билік әріптестігі талқыланды
Ақмола облысының Қорғалжын ауданында «ЖАҢАРУ» республикалық қоғамдық бірлестігінің бастамасымен сыбайлас жемқорлыққа қарсы жалпыұлттық қозғалыс аясында көшпелі кеңес отырысы өтті. Оған аудан әкімі Алмас Алин, мемлекет және қоғам қайраткері Оралбай Әбдікәрімов, «ЖАҢАРУ» сыбайлас жемқорлыққа қарсы қозғалыс» республикалық қоғамдық бірлестігінің төрағасы Мэлс Семғалиев, мемлекет және қоғам қайраткері, «ЖАҢАРУ» республикалық қоғамдық бірлестігі төрағасының орынбасары Бейбіт Мамраев, Ұлттық қауіпсіздік комитетінің генерал-майоры, «ЖАҢАРУ» республикалық қоғамдық бірлестігінің совет мүшесі Сейітжан Қойбақов және бірлестік аппаратының жетекшісі Қабдулла Алиев қатысты.Жиынға аудандық мекеме басшылары, жеке бөлім басшылары, аудан әкімі аппаратының жауапты қызметкерлері, ауланның белсенді азаматтары да шақырылды.
Кеңесті ашқан аудан әкімі Алмас Алин жемқорлықпен күрес – тек мемлекеттік органдардың емес, бүкіл қоғамның ортақ міндеті екенін атап өтті.
Кездесуге қатысушылар «Жаңару» қозғалысының мақсаттары мен міндеттеріне тоқталып, өңірлерде азаматтық бақылауды күшейту, құқықтық сауаттылықты арттыру және жергілікті атқарушы органдар қызметінің ашықтығын қамтамасыз ету бағытында іске асырылып жатқан шаралар мен жобалар туралы айтты. Сондай-ақ, олар саладағы тәжірибелерімен бөлісіп, жемқорлықтың алдын алу шаралары мен қауіпсіздік мәдениетін дамыту мәселелерін де талқылады.
Мұнымен қоса, іс-шара аясында Бейбіт Мамраев Қорғалжын ауданының кітапханасына өзінің жеке қорынан бірнеше кітапты сыйға тартты.
Кеңес соңында Алмас Алин ауданда алдағы уақытта да қоғам мен билік арасындағы сенімді нығайту бағытындағы жұмыстар жалғасатынын атап өтті.
«ЖАҢАРУ» РҚБ баспасөз қызметі
