2026 жылы 11 ақпанда Астана қаласында ҚР Парламент Сенатында «Мемлекеттің сыбайлас жемқорлыққа қарсы саясатының тиімділігін арттыру – елдің одан әрі құқықтық және әлеуметтік-экономикалық дамуының маңызды шарты» тақырыбында дөңгелек үстел өтті.
    Аталған іс-шараға Қазақстан Республикасы Парламент Сенаты, Қазақстан Республикасы мемлекеттік қызмет істер Агенттігі, Қазақстан Республикасы Сот әкімшілігі, Қазақстан Республикасы Бас прокуратурасы жанындағы құқық қорғау органдары Академиясы, МТЖБ «Парламентаризм институты» ШЖҚ РМҚ өкілдері қатысып отырды.
    Дөңгелек үстел тақырыбы аясында «ЖАҢАРУ» Сыбайлас жемқорлыққа қарсы жалпыұлттық қозғалыс» Республикалық қоғамдық бірлестігінің төрағасы Семғалиев Мэлс Зайноллаұлы қатысып, баяндама жасады. Өз баяндамасында мемлекетіміздің сыбайлас жемқорлыққа қарсы саясаттың маңыздылығына тоқталып, тиімділігін арттыру жолдарын атады. Сыбайлас жемқорлыққа қарсы саясатты ғылыми қамтамасыз ету мен сүйемелдеуде сыбайлас жемқорлыққа қарсы іс-қимыл мәселелері жөніндегі зерттеу орталығын құру, жасанды интеллект элементтерін енгізу жайлы бірнеше ұсынысты талқыға салды.
    «ЖАҢАРУ» Сыбайлас жемқорлыққа қарсы жалпыұлттық қозғалыс» РҚБ тарапынан жасалып жатқан жұмыстарға, қол жеткізген жетістіктерге жете тоқталды.
    «Жеке тұлғаның қалыптасуының барлық кезеңдерінде сыбайлас жемқорлыққа қарсы құндылықтарды сіңіру өте маңызды. Бұл тұрғыда Сыбайлас жемқорлыққа қарсы мінез-құлықты отбасы институты арқылы, біздің ұлттық құндылықтарымыз бен дәстүрлерімізге негізделген білім мен тәрбие арқылы дамыту қажет» - деп сөзін түйіндеді.