2024 жылғы 21 маусым күні «ЖАҢАРУ» Сыбайлас жемқорлыққа қарсы жалпыұлттық қозғалыс» Республикалық қоғамдық бірлестігінің делегациясы Ұлытау облысының орталығы Жезқазған қаласына іс-сапармен барды. 
   «ЖАҢАРУ» РҚБ Ұлытау облыстық филиалы бірлестік делегациясының мүшелерін Жезқазған қаласының студенттерімен, жас мемлекеттік қызметшілерімен кездесуін ұйымдастырды.
   Іс-шара «Жастардың құқықтық сауаттылығын және құқық қорғау органдарына сенім деңгейін арттыру іс-шаралар кешенін өткізу» атаулы Әлеуметтік Жобаның аясында өтті.
   Аталмыш Әлеуметтік Жобаны «ЖАҢАРУ» РҚБ Қазақстан Республикасы Мәдениет және ақпарат министрлігінің жанындағы «Азаматтық бастамаларды қолдау орталығы» Коммерциялық емес акционерлік қоғамның қолдауымен жүзеге асыруда.
   Кездесуге төмендегі тұлғалар қатысып, сөз сөйледі:
- Мэлс Зайноллаұлы Семғалиев, «ЖАҢАРУ» РҚБ төрағасы, ҚР Сыбайлас жемқорлыққа қарсы іс-қимыл агенттігінің Қоғамдық кеңесінің мүшесі;
- Оралбай Әбдікәрімұлы Әбдікәрімов, «ЖАҢАРУ» РҚБ Құрметті төрағасы, мемлекет және қоғам қайраткері;
- Бейбіт Баймағамбетұлы Мамраев, «ЖАҢАРУ» РҚБ Құрметті төрағасы төрағасының орынбасары, академик, филология ғылымдарының докторы, профессор;
- Марат Оралбайұлы Әбсеметов, мемлекет және қоғам қайраткері С. Сейфуллин музейінің директоры, тарих ғылымдарының докторы, профессор;
- Сәкен Орынбайұлы Сейфуллин, мемлекет және қоғам қайраткері С. Сейфулиннің немересі;
- Серік Мұсаұлы Тайтөлеуов, «Шоң би» қоғамдық қорының төрағасы.
   Мэлс Зайноллаұлы Семғалиев өз сөзінде Бірлестіктің қызметінің мәні «Қазақстан Республикасының заңнамасына және Бірлестіктің Жарғысына сәйкес сыбайлас жемқорлыққа қарсы іс-қимыл және оның туындау себептерін жою» екенін айтты және осыдан туындайтын қозғалыс мүшелерінің мақсаттарын түсіндірді. Ол сонымен қатар, бірлестіктің Орталық аппараты мен филиалдарының жасап жатқан жұмыстары туралы және олардың алдағы жоспарлары туралы ақпарат берді.  
   Оралбай Әбдікәрімұлы Әбдікәрімов «Жастардың құқықтық сауаттылығын және құқық қорғау органдарына сенім деңгейін арттыру іс-шаралар кешенін өткізу» атаулы Әлеуметтік Жобаның аясында өткізіліп жатқан кездесулердің мәні мен мағынасын, олардың тиімділігі мен нәтижелері туралы сөз қозғады.
   Бейбіт Баймағамбетұлы Мамраев «ЖАҢАРУ» қозғалысының мемлекеттік органдармен және қоғамдық ұйымдармен сыбайлас жемқорлыққа қарсы бірлесіп ұйымдастырып жатқан іс-қимылдары туралы баяндады, жастардың құқықтық сауаттылығын және құқық қорғау органдарына сенім деңгейін арттырудың қазіргі замандағы өзектілігі мен маңызы туралы пікірлерімен бөлісті.
   Марат Оралбайұлы Әбсеметов, Сәкен Орынбайұлы Сейфуллин, Серік Мұсаұлы Тайтөлеуовтер мемлекет және қоғам қайраткері Сәкен Сейфуллиннің туғанына 130 жыл толуына байланысты өткізіліп жатқан іс-шаралар туралы айта отырып,  атақты да даңқты белгілі тұлғалардың өнегелерін жастарды тәрбиелеу, олардың сыбайлас жемқорлыққа қарсы саналы көзқарасын қалыптастыру жолында пайдалану керектігі туралы ойларын айтты.
   Жиналыстың соңына қарай «сұрақ-жауап» түрінде пікір алмасу өтті.
   Кездесуден соң «ЖАҢАРУ» РҚБ делегациясының мүшелері, студенттер, жас мемлекеттік қызметшілер өткен ғасырдағы Қазақ мемлекетінің негізін қалаған тұлғалардың бірі Сәкен Сейфуллиннің ескерткішіне гүл шоғын қою рәсіміне қатысты.