«ТАЗА ФУТБОЛ» турнирі

2026 жылы 1 қарашада Әл-Фараби атындағы Қазақ ұлттық университетінде «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында «ЖАҢАРУ» РҚБ Алматы қалалық филиалының және Тарих факультетінің Құқықтық тәртіп жасағының бірлесе ұйымдастыруымен спорттық шара өтті. 

9 желтоқсан - Халықаралық сыбайлас жемқорлыққа қарсы күрес күніне орай өткізілген шараның мақсаты – жастар арасында парасаттылық, әділдік және адалдық қағидаттарын дәріптеу; сыбайлас жемқорлыққа қарсы мәдениетті спорттық шаралар («Fair Play» - таза ойын қағидасы) арқылы қалыптастыру; жастар мен қоғамдық ұйымдар арасындағы әріптестікті, ынтымақтастықты нығайту және салауатты өмір салтын насихаттау.

«ЖАҢАРУ» Сыбайлас жемқорлыққа қарсы жалпыұлттық қозғалыс» РҚБ Алматы қаласы бойынша филиалының директоры Джапаров Борис Аликенович ашылу салтанатынды сөз сөйлеп, Халықаралық сыбайлас жемқорлыққа қарсы күрес күнінің маңызына, әділ бәсеке мен таза ойынның адал қоғам құрудағы рөліне тоқталды.

Турнирге жастардан, студенттерден және қоғамдық белсенділерден құралған 8 команда қатысты. Жарыс бекітілген регламентке сәйкес тартысты әрі әділ спорттық күрес аясында өтті. Қатысушылар жоғары деңгейдегі бірлік пен достық ниеттерін көрсетті.

Ойындар қорытындысы бойынша жүлделі орындар келесідей бөлінді:

І орын: 3 курс Ғылыми тарих командасы

ІІ орын: 2 курс ХистБөрілер командасы

ІІІ: 4 курс Ерасылдың бауырлары командасы

Жекелеген номинациялар:

Үздік ойыншы: 2 курс Мұрсалин Диас

Үздік қақпашы: 2 курс Есаман Жалғасбек

Үздік сұрмерген: 3 курс Марат Мейірхан

Жеңімпаздар мен жүлдегерлер дипломдармен, кубоктармен және естелік сыйлықтармен марапатталды.

«Таза ойын - адал қоғам!» ұранымен ұйымдастырылған турнир өз мақсатына толық жетті. Жастар сыбайлас жемкорлыққа қарсы мәдениет пен әділдіктің тек заң аясында ғана емес, спортта да басты құндылық екенін іс жүзінде көрсетті.

Серіктес ұйымдармен бірлескен жұмыс сәтті аяқталып, алдағы уақытта осындай тәрбиелік және бұқаралық шараларды тұрақты негізде ұйымдастыру ұсынылды.

«ЖАҢАРУ» РҚБ Баспасөз қызметі