2026 жылы 8 қазан күні Атырау қаласында жастардың құқықтық сауаттылығын арттыруға бағытталған форсайт-сессия өтті. Шара «ЖАҢАРУ» Сыбайлас жемқорлыққа қарсы жалпыұлттық қозғалыс» РҚБ Атырау облыстық филиалының ұйымдастыруымен, Х.Досмұхамедов атындағы Атырау университеті Экономика және құқық факультетінің Қылмыстық-құқықтық пәндер кафедрасы және Медиация орталығымен бірлесіп өткізілді. Кездесу «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты әлеуметтік жоба аясында, сондай-ақ «ЖАҢАРУ» РҚБ Атырау облыстық филиалы мен Атырау облыстық Жастар ресурстық орталығы арасындағы өзара ынтымақтастық туралы меморандум шеңберінде болды.
   Форсайт-сессияның басты мақсаты – жастар арасында құқықтық мәдениетті қалыптастыру, сыбайлас жемқорлыққа қарсы тұрақты көзқарас пен иммунитетті дамыту.
   Сессия барысында сарапшылар мен қоғам белсенділері жастармен ашық форматта пікір алмасып, өзекті тақырыптарды талқылады: Г.Е. Жармуханбетова – Атырау облысы «Қоғамдық келісім» КММ Медиация кеңесінің сарапшысы, кәсіби медиатор. Тақырыбы: «Дау емес – диалог: жастар және медиация»; А.Қ. Қуантай – Атырау облыстық Жастар ресурстық орталығы кеңес беру бөлімінің маманы. Тақырыбы: «Жастарды құқықтық және азаматтық тәрбиелеудегі Жастар ресурстық орталығының рөлі»; Д.Ж. Кабдрашева – Атырау облыстық Жастар ресурстық орталығының психологы. Тақырыбы: «Қысымсыз таңдау: адал мінез-құлық психологиясы»; А.З. Сабидуллина – ҚҚҚ ББ 4-курс студенті. Тақырыбы: «Жемқорлыққа қарсы иммунитет: оны қалай қалыптастырамыз?».
   Жиын барысында қатысушылар сыбайлас жемқорлықсыз қоғам құрудағы жастардың рөлі туралы ой-пікірлерін ортаға салып, психологиялық жаттығулар жасалып, ұсыныстар айтылды. Сондай-ақ жоба аясында әзірленген ақпараттық парақшалар таратылып, QR код арқылы сауалнама мен тестілеу жүргізілді.
   Шара соңында «ЖАҢАРУ» РҚБ Атырау облыстық филиалының директоры С.Н. Идрисовтың атынан спикерлерге Алғыс хаттар табысталды.
   Жастар – адал және әділ қоғам құрудың басты күші!