16.08.2025 15 тамыз күні Жамбыл облысы әкімдігінің Дене шынықтыру және спорт басқармасының қолдауымен «ЖАҢАРУ» сыбайлас жемқорлыққа қарсы жалпыұлттық қозғалыс» республикалық қоғамдық бірлестігінің Жамбыл облыстық филиалымен бірлесіп Тараз қаласындағы «Қоғамдық келісім» мекемесінің «Достық үйінде» «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты Спорт күніне орай салтанатты жиын - акция ұйымдастырды.
Салтанатты жиын Жамбыл облысы спортшыларының жетістіктері туралы видеоролик көрсетумен басталды. Облыс әкімдігінің Дене шынықтыру және спорт басқармасы басшысы Ернар Таласбекұлы Ибраимов спорт ардагерлері мен спорт саласының үздік қызметкерлерін Спорт күнімен құттықтап, марапаттады. Олардың ішінде мемлекеттік қызметші де бар. Қазақстан Республикасы Туризм және спорт министрлігінің «Құрметті спорт қызметкері» төсбелгісімен облыс әкімдігінің Дене шынықтыру және спорт басқармасы басшысының орынбасары Ғали Райымқұлов марапатталды, Құтты болсын!
Сондай-ақ, спорт жанашырлары мен озық спорт қызметкерлерін «Қазақстандық салалық мәдениет, спорт, туризм және ақпарат қызметкерлерінің кәсіптік одақ» қоғамдық бірлестігінің төрағасы, облыстық қоғамдық кеңестің төрағасы Дүйсенәлі Бықыбаев құттықтап марапаттады. Олардың ішінде маған спорт жанашыры, жанкүйері деп Орталық салалық кәсіподақтың «КӘСІПОДАҚ АРДАГЕРІ» төсбелгісі тапсырылды.
Жалпы шараға облыс әкімдігінің дене шынықтыру және спорт басқармасы басшысы Ернар Ибраимов, облыстық қоғамдық кеңестің төрағасы, «Қазақстандық салалық мәдениет, спорт, туризм және ақпарат қызметкерлерінің кәсіптік одақ» қоғамдық бірлестігінің төрағасы Дүйсенәлі Бықыбаев, облыс прокурорының аға көмекшісі Ернұр Берікұлы, облыстық спорт ардагерлері кеңесінің төрағасы Тәуірбек Қарауылтегі, Грек-рим күресінен әлем чемпионатының қола жүлдегері Марлен Мейірбекұлы, облыстық мәслихат депутаты, «Динамо-Тараз» волейбол командасының директоры Андрей Анатольевич Савченко, Тараз қалалық мәслихат депутаты, облыстық қоғамдық кеңестің мүшесі, «Жекпе-Жек» кәсіпқой клубының басшысы Елдос Далабай қатысты.
Сонымен қатар, облыс әкімдігінің дене шынықтыру және спорт басқармасының басшылығы мен қызметкерлері, Тараз қаласының, аудандардың спорт мекемелерінің басшылары мен озат қызметкерлері, спортшылар, облыстық жастар ресурстық орталығының белсенділері мен БАҚ өкілдері – барлығы 170 ке жуық адам қатысты.
Жастардың «Коррупцияға - жол жоқ!» атты Флешмобы акциясы өтті, Грек-рим күресінен әлем чемпионатының қола жүлдегері Марлен Мейірбекұлы жалынды сөз сөйлеп жастарды жемқорлыққа қарсы күреске шақырып, Спорт күнімен құттықтады.
Ал «ЖАҢАРУ» сыбайлас жемқорлыққа қарсы жалпыұлттық қозғалыс» республикалық қоғамдық бірлестігі филиалының директоры Қасымхан Төлендиев негізгі тақырып бойынша баяндама жасады. Онда спорт саласының қайраткерлері мен қызметкерлерін, жас спортшыларды адалдыққа, заңды құрметтеуге, тәртіпті және мәдениетті болуға шақырып, тамыз айының үшінші жексенбісінде тойланатын Спорт күні мерекесімен құттықтады.
«Кеше ғана Олимпиада отаны – Грекия астанасы Афина қаласында өткен грек-рим күресі бойынша Әлем чемпионатынан жерлесіміз, жаңа ғана алдарыңызда сөйлеген Марлен Мейірбекұлы қола жүлдемен оралды. Ол қола бізге алтынмен тең деп айтуға болады, бұл қола ертеңгі алтынның бастауы!
Алла қаласа, 2028 жылғы АҚШ-тың Лос – Анжелес қаласында өтетін 34–ші жазғы Олимпиадасында Марлен алтын медальды жеңіп алып, Жақсылық Үшкемпіровтың ерлігін қайталаса деген ақ тілегімді айтқым келеді. Ол үшін Елдос Сметов құсап, бапкерің Теміржан Орынбаев екеуің тынымсыз еңбектеніп техникалық шеберлікті шыңдай беріңдер, сонда жетесіңдер мақсаттарыңа, біз сенеміз!» дедім.
. Қазақстан бүгінде «Тәртіп пен қауіпсіздік» көрсеткіші бойынша әлемдегі 142 елдің ішінен 43 орында тұр.
Осы орайда «ЖАҢАРУ» сыбайлас жемқорлыққа қарсы жалпыұлттық қозғалыс» РҚБ – нің соңғы жылдары іске асырып жатқан жастардың құқықтық сауаттылығы және сыбайлас жемқорлыққа қарсы тәрбиелеуге арналған жобаларының маңыздылығы зор.
Оның мақсаты: - Өскелең жас ұрпақты қоғамның заңдары мен нормаларын бұлжытпай орындауға, құқық бұзушылықтың алдын алуға тәрбиелеу. Жастардың құқықтық сауаттылығын арттырып, қоғамда құқықтық мәдениетті қалыптастыру. Адалдық пен адамгершіліктің маңыздылығын түсіндіру, заңға қайшы әрекеттер мен әрекетсіздіктерден хабардар болуына ықпал ету.
Қоғамда «Заң мен тәртіп» қағидатын нығайту бойынша облыстық прокуратура мен полиция департаменті, облыстық ардагерлер кеңесі кешенді шаралар өткізуде. Мәселен ақпан айында мұндай шара облыстық Полиция департаментінің бастамасымен «Тәрбиелі жастар – қоғам тірегі» атты жастар форумын кең көлемде өткізді. Сондай форумды облыстық ардагерлер кеңесі де 6 тамыз күні ұйымдастырып, облыс жұртшылығына Үндеу жасады. Ақпан айында біздің «ЖАҢАРУ» филиалы облыстық Полиция департаментімен Меморандумға тұрды. Ал 2023 жылдың қараша айында «ЖАҢАРУ» РҚБ облыс әкімімен коррупцияға қарсы өзара ынтымақтастық таныту туралы келісімге қол қойылды.
Осындай іс-шаралар жас спортшылар, спорт ұйымдары басшыларының арасында да құқықтық сана мен тәртіпті арттыру, құқықбұзушылықтың және қылмыстың алдын алу, спортшыларға оң тәрбие беру мен олардың патриоттық сезімдерін арттыруға айтарлықтай үлес қосады.
Бүгінгі салтанатты жиынға қатысқан 150 – ден аса спортшылар ел Президентінің «Заң мен тәртіп» қағидатын және сыбайлас жемқорлыққа қарсы жариялаған күресін қолдайтындарын жеткізді.
Сондай-ақ, жиында облыс прокурорының аға көмекшісі Ернұр Берікұлы, облыстық мәслихат депутаты, «Динамо-Тараз» волейбол командасының директоры Андрей Анатольевич Савченко сөз сөйлеп, спортшыларды, спорт мекемелерінің басшылары мен қызметкерлерін заңбұзушылықтың алдын алуға, жемқорлыққа қарсы күреске шақырды.
Коррупцияға қарсы ВИКТОРИНА өткізілді.
Қасиетті Әулиеата жерінің жақсы спорттық дәстүрі мен жеңісті жолдары жалғаса берсін!
17 тамыз - Спорт күні Құтты болсын!

«ЖАҢАРУ» РҚБ баспасөз қызметі