Маңғыстауда алғаш рет жас әкелер арасында қазақ күресінен «Әкелер барысы – 2025» турнирі өтті. Ерекше жарыс Түпқараған ауданында ұйымдастырылды.

Iс-шара «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында өтті. Ұйымдастырушылар – Маңғыстау облыстық «Әкелер одағы» мен «ЖАҢАРУ» сыбайлас жемқорлыққа қарсы ұлттық қозғалысының өңірлік филиалы.

Бастаманың мақсаты – жас әкелерді ұлттық спортпен шұғылдануға тарту, салауатты өмір салтын насихаттау және отансүйгіштікке баулу.

Турнирдің ашылуында Түпқараған ауданы әкімінің орынбасары Өсер Тілепов, «Әкелер одағы» РҚБ МОФ төрағасы әрі «ЖАҢАРУ» қозғалысы директорының орынбасары Аллаберген Қонарбаев және спорт саласының өкілдері сөз сөйлеп, қатысушыларға сәттілік тіледі.

Жарысқа ауданның әр өңірінен келген жас әкелер қатысып, түрлі салмақ дәрежесінде белдесті. Нәтижесінде +75, +85 және +95 кг салмақ санаттарында үздік шыққан балуандар марапатталды.

Ұйымдастырушылардың айтуынша, жоба аясында өткізілген осындай спорттық турнир жыл сайынғы дәстүрлі додаға айналмақ.

«ЖАҢАРУ» баспасөз қызметі