13.06.2025
Қасымхан Естемесұлы Төлендиев жетекшілік ететін Жамбыл облысының «ЖАНАРУ» республикалық қоғамдық бірлестігінің филиалы «Үздік әлеуметтік жоба» байқауында жеңіске жетті. жеңімпаздар бұл марапатты азаматтық қоғамды дамыту жолында атқарған ауқымды әрі нәтижелі жұмыстың жемісі деп біледі. Аталған марапат Жамбыл облысында өткен «Мықты қоғам – Қуатты Қазақстан» атты XII Азаматтық форумы аясында табысталды.
Форум жұмысына Жамбыл облысы әкімінің орынбасары Серік Жақсылықұлы Салемов, ҚР Мәдениет және ақпарат министрлігінің Азаматтық қоғам істері комитетінің басшысы Гүлбара Сұлтанова, Қазақстанның Азаматтық Альянсы төрайымы Бану Нұрғазиева және “Қазақстан халқына” қорының басқарма төрағасы Лаззат Шыңғысбаева қатысып, конференция мен пленарлық отырыстарда сөз сөйледі.
Форумды Жамбыл облыстық «Азаматтық Альянс» төрағасы Исламбек Дастан жүргізді.
Сондай-ақ форумға өңірлік филиалдардағы Азаматтық Альянс басшылары қатысты. Олар өз аймақтарында азаматтық қоғамды дамытуға бағытталған жобалармен бөлісіп, тәжірибе алмасты.
Жиын барысында ҮЕҰ-ның құқықтық жағдайын жетілдіру қажеттігі айтылып, арнайы заң қабылдау ұсынылды. Сонымен қатар, «Азаматтық бастамаларды қолдау орталығы» КЕАҚ тарапынан ауылдық ҮЕҰ-ларға арналған мемлекеттік емес грант шеңберінде «Байзақ ауданы Үлгілі ауылы тұрғындарының азаматтық бастамаларын қолдау» атты жоба бойынша конкурс жарияланды.
Өтінімдер 2025 жылғы 12 маусым мен 2 шілде аралығында сағат 18:30-ға дейін қабылданады. Байланыс телефоны: 7172 790431.
Шара соңында бірқатар белсенді ҮЕҰ жетекшілері Құрмет грамоталарымен, Алғыс хаттармен және арнайы сертификаттармен марапатталды.
“ЖАҢАРУ” баспасөз қызметі
