І. Жансүгіров атындағы Жетісу университетінде «ЖАҢАРУ» жалпыұлттық сыбайлас жемқорлыққа қарсы қозғалысы» бірлестігінің қолдауымен халықаралық ғылыми-тәжірибелік конференция өтті. Ол мемлекеттік қызметшілердің ұйымдастырушылық мәдениеті және оның Қазақстанның сыбайлас жемқорлыққа қарсы стратегиясындағы рөлі тақырыбына арналды. 

Конференцияға Қазақстан, Польша, Түркия, Өзбекстан және басқа да елдерден келген ғалымдар, мемлекеттік органдар мен үкіметтік емес ұйымдардың өкілдері қатысты. Барлығы 80-нен астам адам қатысып, бұл саладағы өзекті мәселелер мен болашақ даму бағыттарын талқылады. Іс-шара аралас форматта өтті.

Жиынды Жетісу университетінің ректоры, заң ғылымдарының докторы Ермек Бөрібаев ашып, пленарлық отырыстың модераторы болды. Пленарлық бөлімде прокуратура, әкімдік, полиция және Мемлекеттік басқару академиясы өкілдері сөз сөйледі. Конференция барысында сондай-ақ, «ЖАҢАРУ» жалпыұлттық сыбайлас жемқорлыққа қарсы қозғалысы» РҚБ төрағасы Мэлс Семғалиев сөз алып, қатысушыларға табысты әрі нәтижелі жұмыс тіледі.

Пленарлық отырыстан кейін қатысушылар секциялық бағыттар бойынша шеберлік сағаттарын тыңдады. Мемлекеттік қызметшілердің әдеп кодекстері, сыбайлас жемқорлық тәуекелдерін азайтудағы цифрландырудың рөлі, халықаралық комплаенс тәжірибелері мен жастардың антикоррупциялық бастамалары кеңінен талқыға түсті.

Халықаралық тәжірибеге ерекше назар аударылды. Мәселен, Түркия, Польша және Өзбекстан сарапшыларының баяндамалары көрерменнің қызығушылығы мен пікірталасын тудырды.

Конференция соңында мемлекеттік органдарға жолданатын бірқатар ұсыныстар қабылданды. Олар сыбайлас жемқорлыққа қарсы заңнаманы жаңарту, мемлекеттік қызметтегі этиканы нығайту және цифрлық құралдарды енгізу мәселелерін қамтиды. Бұл ұсыныстар 2025–2030 жылдарға арналған жаңа Антикоррупциялық стратегияны жүзеге асырудың негізі болмақ.