06.05.2025       Бүгін Тараз қаласындағы “Жеңіс” саябағында орналасқан “Даңқ” орталығында Ұлы Отан соғысындағы Жеңістің 80 жылдығы мен Кеңес Одағының Батыры Бауыржан Момышұлының 115 жылдығына арналған “Ұлы Жеңіске – 80 жыл және Бахадүр Бауыржан” атты мерекелік іс-шара өтті.
     Салтанатты жиынды Жамбыл облыстық ардагерлер кеңесінің төрағасы Еркінбек Бейсенбекұлы Солтыбаев ашып, құттықтау сөз сөйледі. Ол өз сөзінде аты аңызға айналған қолбасшы, қазақ халқының маңдайына біткен жарық жұлдыз, Кеңес Одағының Батыры, жауынгер-жазушы Бауыржан Момышұлының ерлігі – ұрпаққа ұран, елге мұра екенін атап өтті.
– Ерлік – елге мұра, ұрпаққа – ұран, – деді ол.
     Шара барысында Тараз қаласы әкімінің орынбасары Улана Сламбекова, жазушы-драматург Елен Әлімжан, батырдың немере інісі, Бауыржантану орталығының басшысы Бекет Момынқұл, генерал-майор Әлімжан Ерниязов сөз алып, Бауыржан Момышұлының өмір жолы мен ерлік істері – жастарға үлгі екенін ерекше атап өтті.
     Іс-шара аясында “Даңқ” орталығында Жамбыл облыстық әскери комиссариатын ұзақ жылдар басқарған, өз ісіне адал офицер, полковник Айтжан Қалтаевқа арналған бұрыш ашылды. Бұл бұрыш – әскери қызметтің үлгісі болған азаматтың рухына тағзым және оның есімін мәңгі есте сақтау мақсатында ашылып отыр. Ашылу рәсіміне марқұмның қызы Сәуле Қалтаева мен жиені қатысты.
     Мерекелік шарада соғыс және еңбек ардагерлері, зиялы қауым өкілдері, әскери қызметшілер, жас патриоттар мен қала тұрғындарының қатысуымен ардагерлердің күшімен ұйымдастырылған концерт өтті.
     Сондай-ақ іс-шараға «ЖАҢАРУ» Сыбайлас жемқорлыққа қарсы жалпыұлттық қозғалысы» РҚБ Жамбыл облысы бойынша филиалының директоры, соғысқа қатысқан майдангердің ұлы Қасымхан Естемесұлы Төлендиев қатысты.
     Бұл шара – тарихты ұмытпау, ерлердің ерлігін ұлықтау, жас ұрпаққа патриоттық тәрбие беру жолындағы маңызды қадамдардың бірі болды.

 “ЖАҢАРУ” баспасөз қызметі