23.04.2025 Атырау қаласындағы «BAIZAAR» сауда ойын-сауық орталығында «Заң және тәртіп» қағидаты аясында қоғамдық қабылдау ұйымдастырылды. 

Іс-шара Мәдениет және ақпарат министрлігі мен Азаматтық бастамаларды қолдау орталығының қолдауымен жүзеге асырылып жатқан «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында өткізілді.

Қоғамдық қабылдауға ҚР Сыбайлас жемқорлыққа қарсы іс-қимыл агенттігі Атырау облысы бойынша департаменті, «ЖАҢАРУ» сыбайлас жемқорлыққа қарсы жалпыұлттық қозғалысы» РҚБ-нің Атырау облысындағы филиалы, Атырау университеті жанындағы Сыбайлас жемқорлық мәселелерін зерттеу орталығы және Экономика және құқық факультетінің Медиация орталығы мұрындық болды. Шараға ҚР Сыбайлас жемқорлыққа қарсы іс-қимыл агенттігінің Атырау облысы бойынша департаментінің, облыстық және қалалық прокуратураның, полиция және  әділет департаменттерінің, адвокаттар алқасының, «Халықаралық құқық қорғау орталығы» РҚБ Атырау облыстық филиалының өкілдері және университеттің оқытушылары қатысты.

«Мақсатымыз– тұрғындарға құқықтық көмек көрсету, мемлекеттік органдардың қызметіне деген сенімді арттыру, азаматтардың құқықтық сауаттылығын күшейту және халықпен ашық диалог орнату», - дейді ұйымдастырушылар.

Қабылдау барысында тұрғындар көкейіндегі сұрақтарын қойып, мамандардан тікелей жауап алды. Кейбір мәселелер сол жерде шешімін тапса, күрделі сұрақтар бақылауға алынды.

Ұйымдастырушылардың айтуынша, мұндай іс-шаралар алдағы уақытта да жалғасын табады.

«ЖАҢАРУ» РҚБ баспасөз қызметі