17.04.2025     Бүгін Чаглинка ауылындағы Жоғары агротехникалық колледжі студенттеріне «Қазақстан Республикасының сыбайлас жемқорлыққа қарсы саясаты» тақырыбында семинар өткізілді. Іс-шара Мәдениет және ақпарат министрлігі мен Азаматтық бастамаларды қолдау орталығының қолдауымен жүзеге асырылып жатқан «Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясында ұйымдастырылды.
    Шараны «ЖАҢАРУ» сыбайлас жемқорлыққа қарсы жалпыұлттық қозғалысы» РҚБ-нің Ақмола облыстық филиалы мен өңірбің Сыбайлас жемқорлыққа қарсы іс-қимыл агенттігі департаментінің превенция басқармасы ұйымдастырды.
    Семинардың мақсаты – жастарға құқықтық білім беру, құқық бұзушылықтардың алдын алу және сыбайлас жемқорлыққа қарсы мәдениетті қалыптастыру. Семинарға қатысушыларға жобаның мақсаты мен мазмұны таныстырылып, адалдық, ашықтық және азаматтық жауапкершілік қағидаттары талқыланды.
    Семинар барысында студенттер алдында «ЖАҢАРУ» РҚБ Ақмола облыстық филиалының директоры Игорь Плюснин және Ақмола облысы бойынша Сыбайлас жемқорлыққа қарсы іс-қимыл агенттігі департаментінің превенция басқармасының аға маманы Аманжол Құсайынов сөз сөйледі.
    Спикерлер жастардың қоғамдағы әділеттілік пен парасаттылық қағидаттарын нығайту жұмыстарына белсене араласуының маңыздылығын тілге тиек етті.
    «Жастар – мемлекетіміздің болашағы. Әр жас азамат өз құқығы мен бостандығын білуі тиіс. Жастар арасында сыбайлас жемқорлыққа қарсы сананы қалыптастыру – әділ қоғам құру жолындағы маңызды қадам», – дейді ұйымдастырушылар.

«ЖАҢАРУ» РҚБ баспасөз қызметі