2026 жылғы 6 қарашада «ЖАҢАРУ» Сыбайлас жемқорлыққа қарсы жалпыұлттық қозғалыс» республикалық қоғамдық бірлестігінің Абай облысы филиалының ұйымдастыруымен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты жобасы аясында Семей қаласындағы кәмелетке толмағандарды бейімдеу орталығының мамандарына арналған «Жасөспірімдер арасындағы девианттық мінез-құлықтың алдын алу» тақырыбында оқыту семинары өтті.
   Семинардың мақсаты – қиын өмірлік жағдайға тап болған балалармен жұмыс істейтін мамандардың кәсіби құзыреттілігін арттыру, жасөспірімдердің құқықтары мен заңды мүдделерін қорғау және құқық бұзушылықтың алдын алудың тиімді тәсілдерін талқылау.
   Іс-шара барысында «ЖАҢАРУ» РҚБ Абай облысы филиалының өкілі Назигүл Газизова жасөспірімдердің девианттық мінез-құлқы мен құқықтық жауапкершілігі жөнінде дәріс оқыды. Ал Shakarim University Психологиялық қолдау қызметінің басшысы Қымбат Нұрмұхамбетова мен қызмет маманы Қымбат  Сағындықова арнайы тренинг өткізіп, жасөспірімдердің психологиялық ерекшеліктерін ескеру, мінез-құлқындағы өзгерістерді байқау, сенімді байланыс орнату және психологиялық қолдау көрсету әдістерін тәжірибе жүзінде таныстырды.
   Теориялық білім мен практикалық жұмысты ұштастырған семинар мамандардың тәжірибе алмасуына және өзара іс-қимылдың тиімді жолдарын қарастыруына мүмкіндік берді. Курс соңында оқыту семинарына қатысқандарға сертификат табысталды.
   Баланың мінез-құлқындағы қиындықты жазалау арқылы ғана шешу мүмкін емес. Ең алдымен, оның себебін түсініп, дер кезінде қолдау көрсетіп, қауіпсіз әрі сенімді орта қалыптастыру қажет. Әрбір жасөспірімнің артында жеке тағдыр, отбасы және үлкен үміт тұрғанын ұмытпауымыз керек.
   Психологиялық қолдау, құқықтық сауаттылық және әлеуметтік жауапкершілік бағыттарындағы бірлескен жұмыстар да өңірдің тұрақты дамуына қызмет етеді.