20.10.2026

«ЖАҢАРУ» Kazakhstan Prevention Days 2026 көрмесіне қатысты

   17 қазан Астанада құқық бұзушылықтың алдын алу және қоғамдық қауіпсіздік мәселелеріне арналған Kazakhstan Prevention Days 2026 көрмесі өтті.
   Ауқымды шараны Ішкі істер министрлігі «Құқық бұзушылықтың алдын алу туралы» Қазақстан Республикасы Заңын іске асыру аясында, Республика күнінің 35 жылдығына орай, «Құқық бұзушылықтың алдын алудағы жасанды интеллекттің рөлі» тақырыбында өткізді.
   Негізгі мақсаты – құқық бұзушылықтың салдарымен күресуден бұрын, оның алдын алуға басымдық беретін заманауи қауіпсіздік экожүйесін қалыптастыру.
   Бұл іс-шараға мемлекеттік органдар, ғылыми және волонтерлік қоғамдастықтар, үкіметтік емес ұйымдарды қоса алғанда, әртүрлі қызмет салаларындағы отандық және шетелдік мамандар қатысты.
   Көрмеде басты тақырыбы «Заң мен Тәртіп» қағидатын қамтитын құқық бұзушылықтардың алдын алуға бағытталған 60-қа жуық жоба таныстырылды.
   Осы алаңда «ЖАҢАРУ» өз жобасын таныстырды. Бірлестік көрмеде «Жастарды құқықтық тәрбиелеу - сыбайлас жемқорлыққа қарсы дүниетанымның негізі» атты жобасын ұсынды. Жоба жастар арасында құқықтық мәдениетті қалыптастыруға, сыбайлас жемқорлыққа төзбеушілікті тәрбиелеуге және «Заң мен Тәртіп» қағидатын өмірлік ұстанымға айналдыруға бағытталған. Бірлестік жасөспірімдер мен студенттерге арналған адалдық сабақтарын, антикоррупциялық тренингтер мен құқықтық сауаттылық бойынша интерактивті алаңдарды дамыту тәжірибесін көрсетті.
   Көрме барысында қауіпсіз қоғамның заманауи бейнесі ұсынылып, ең мықты бастамалар бір арнада тоғысты.
   Мемлекеттік органдар мен IT-мамандарды, үкіметтік емес ұйымдарды, белсенділерді біріктірген алаң құқық бұзушылықтың алдын алу шарасын жаңа деңгейге көтереді деп күтілуде.

 «ЖАҢАРУ» баспасөз қызметі