12.10.2026
ҚАЛПЫНА КЕЛТІРІЛГЕН ҚҰҚЫҚ: ТАҒЫ БІР ЖЕҢІС. ТАҒЫ БІР ҮМІТ.
Батыс Қазақстан облысында балалар үйінің түлегі Хохлачева Ольга Викторовнаның тұрғын үй құқығы қалпына келтірілді. 2026 жылдың сәуір айында аталған санаттағы азаматша «ЖАҢАРУ» бірлестігінің Батыс Қазақстан облыстық филиалының «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты жобасы аясында құрылған қоғамдық қабылдауына «жетім балалар, ата-анасының қамқорлығынсыз қалған балалар» санаты бойынша тұрғын үй кезегінен шығарылғанына қатысты шағыммен жүгінген. Өтініш иесінің айтуынша, ол 7 жыл бойы кезекте тұрған және беймәлім жағдайда кезектен шығарылған яғни құқығының шектелгенін жазған. Бірлестік заңгерлері сотқа дейінгі жұмыстарды жүргізіп, құжаттарды зерделеп, уәкілетті органдарға өтініштер жолдады. Кейін бұзылған құқықты қалпына келтіру туралы әкімшілік талап-арыз дайындалып, сотқа берілді. Сот талаптарды толық көлемде қанағаттандырды. Бүгінгі күні Ольга Хохлачеваның құқықтары толығымен қалпына келтірілді – ол қайтадан өзінің бұрынғы тұрғын үй кезегінде тұр.«Мұндай әрбір өтініштің артында нақты адамның тағдыры тұр, әсіресе балалар үйінің түлектері туралы сөз болғанда, олардың өз құқықтарын қорғауға көмектесетін ешкімі жоқ», - деп атап өтті «ЖАҢАРУ» бірлестігінің өкілі Қызылбасов Марат Рахымұлы. Ұйымда қиын өмірлік жағдайға тап болған азаматтардың құқықтарын қорғау жұмыстарын жалғастыра беретінін жеткізді.
«ЖАҢАРУ» РҚБ Баспасөз қызметі