І. Жансүгіров атындағы Жетісу университеті мен Қазақстан Республикасы Қаржылық мониторинг агенттігінің Жетісу облысы бойынша Экономикалық тергеп-тексеру департаменті арасында ынтымақтастық туралы меморандумға қол қойылды

Ағымдағы жылдың 24-қыркүйегінде «Жастарды құқықтық тәрбиелеу - сыбайлас жемқорлыққа қарсы дүниетанымның негізі» жоба аясында «Заң мен тәртіп» қағидатын нығайту бойынша «ЖАҢАРУ» сыбайлас жемқорлыққа қарсы жалпыұлттық қозғалысы, Жетісу облысы бойынша Экономикалық тергеп-тексеру департаменті және І. Жансүгіров атындағы Жетісу университеті бірлесіп кездесу ұйымдастырды.

Кездесу барысында Жетісу университетінің Басқарма төрағасы – ректор, «ЖАҢАРУ» РҚБ-нің Жетісу облыстық филиалының директоры Ермек Бөрібаев департаментпен оқу-тәжірибелік бағытта көп жылдан бері әріптестік байланыс орнағанын, университет студенттері жыл сайын департаментте кәсіби практикадан өтетінін және аймақтағы мемлекеттік органдарда университет түлектерінің едәуір бөлігі еңбек ететінін айтты.

Жетісу облысы бойынша Экономикалық тергеп-тексеру департаментінің басшысы Дастан Букашев студенттерге практикалық білім берудің маңыздылығына тоқталды. Өз сөзінде, студенттермен экономикалық құқықбұзушылықтарды анықтау және олардың алдын алу бағытында практикалық сабақтар өткізетіндіктерін, тәжірибе барысында жоғары белсенділік танытып, білімін көрсеткен студенттерді болашақта жұмысқа шақыруға мүмкіндік бар екенін баса айтты.

Келген қонақтарға Құқық және экономика факультетінің материалдық-техникалық базасы таныстырылып, факультеттің оқу аудиториялары, сот процесін өткізуге арналған арнайы залы көрсетілді.

Іс-шара соңында Қазақстан Республикасы Қаржылық мониторинг агенттігінің Жетісу облысы бойынша Экономикалық тергеп-тексеру департаменті Превенция және талдау әзірлемелері басқармасының бастығы Мейрам Қасымбеков студенттерге «Дропперлік: киберқылмыскерлердің құралына айналмау жолдары» тақырыбында қызықты дәріс оқыды. Дропперлік схемалардың қауіптері, киберқылмыскерлердің әрекет ету тәсілдері және заңсыз қаржылық операцияларға тартылмаудың жолдары түсіндірілді.

Студенттер сұрақ қойып, сұрақтарға жауап беріп, белсенділік танытты.

«ЖАҢАРУ» РҚБ Баспасөз қызметі