16-18 қыркүйек аралығында І.Жансүгіров атындағы Жетісу университетінде студенттер арасында футболдан Басқарма Төрағасы – Ректор кубогі үшін жарыс өтті. Аталған жарыс «ЖАҢАРУ» сыбайлас жемқорлыққа қарсы жалпыұлттық қозғалысымен бірлесіп ұйымдастырылды. Жарысқа университеттің бес факультеті мен Жансүгіров колледжінен барлығы 108 студент қатысып, өзара бақ сынады.
   Дәстүрлі жарыстың мақсаты студенттер арасында бұқаралық спортты, салауатты өмір салтын және футбол ойынын насихаттау, сонымен бірге олардың бойында жоғары адамгершілік құндылықтарды қалыптастыру; студенттердің жекелей спорттық шеберліктерін арттыру; факультеттер арасындағы спорттық-жолдастық қарым-қатынасты нығайту және үздік ойыншыларды іріктеу болды.
   Жарыс қортындысы бойынша І орынды Құқық және экономика факультеті, ІІ орынды Жаратылыстану-техникалық факультеті, ІІІ орынды Физика-математика факультеті иеленді. Жүлделі орынға ие болған командалар Басқарма Төрағасы – Ректордың кубогімен және арнайы грамоталармен марапатталды.
   Қорытындылай келе, бұл турнир тек спорттық бәсеке ғана емес, сонымен қатар студенттердің бойында жоғары адами құндылықтарды қалыптастырудың маңызды алаңына айналды. «ЖАҢАРУ» қозғалысымен бірлесіп өткізілген бұл жарыс алаңдағы әділ ойын қағидалары мен сыбайлас жемқорлыққа қарсы іс-қимылдың басты құндылығы – ішкі адалдықты ұштастыра білді. Ойын барысында студенттер таза бәсекелестіктің, ережеге бағынудың және қарсыласқа деген құрметтің шынайы үлгісін көрсетті. Турнир жастар арасындағы достық байланысты бекемдеп, әділдік пен турашылдықты ту еткен парасатты қоғам қалыптастыруға өз үлесін қосты.