ЖАСТАРДЫ ҚҰҚЫҚТЫҚ ТӘРБИЕЛЕУ – СЫБАЙЛАС ЖЕМҚОРЛЫҚҚА ҚАРСЫ ДҮНИЕТАНЫМНЫҢ НЕГІЗІ

Павлодар облысында жастардың құқықтық сауаттылығын арттыруға, сыбайлас жемқорлыққа қарсы мәдениетті қалыптастыруға және қоғамдағы адалдық құндылықтарын нығайтуға бағытталған жұмыстар жүйелі түрде жалғасуда.

«ЖАҢАРУ» Сыбайлас жемқорлыққа қарсы жалпыұлттық қозғалысы» республикалық қоғамдық бірлестігінің Павлодар облыстық филиалының ұйымдастыруымен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» арнайы әлеуметтік жобасын іске асыру аясында Павлодар қаласындағы Инновациялық Еуразия университетінің студенттерімен маңызды кездесу өтті.

Іс-шара барысында жастарға құқықтық мәдениетті қалыптастыру, сыбайлас жемқорлықтың алдын алу және қоғамда адалдық пен парасаттылық қағидаттарын орнықтыру мәселелері бойынша арнайы дәріс оқылды.

Кездесудің басты спикері – Павлодар өңіріндегі «ЖАҢАРУ» Сыбайлас жемқорлыққа қарсы республикалық қоғамдық бірлестігі филиалының жетекшісі, Павлодар облыстық мәслихатының депутаты Елгонденов Саят Шалқыбекұлы.

Өз сөзінде Саят Елгонденов жастар арасында құқықтық сауаттылықты арттырудың маңыздылығына тоқталып, сыбайлас жемқорлықтың қоғам дамуына кері әсері және оның алдын алуда әр азаматтың жауапкершілігі жоғары екенін атап өтті.

Дәріс барысында қатысушылар құқықтық нормаларды сақтау, мемлекеттік қызметтегі этикалық талаптар, құқық бұзушылық үшін көзделген жауапкершілік түрлері, сондай-ақ сыбайлас жемқорлыққа қарсы іс-қимылдың негізгі тетіктері туралы жан-жақты ақпарат алды.

Сонымен қатар жастардың белсенді азаматтық ұстанымын қалыптастыруға, сыни ойлау қабілетін дамытуға және құқықтық мәселелер бойынша өз пікірін еркін білдіруіне мүмкіндік беретін ашық пікірталас алаңы ұйымдастырылды. Студенттер өздерін қызықтырған сұрақтарын қойып, қоғамдағы адалдық, әділдік, заңдылық және жеке жауапкершілік мәселелері бойынша пікір алмасты.

Жастардың құқықтық мәдениетін қалыптастыру – сыбайлас жемқорлықтың алдын алудың маңызды бағыттарының бірі. Заң талаптарын білу және оны құрметтеу, өз құқықтары мен міндеттерін түсіну, кез келген жағдайда адалдық қағидаттарын ұстану – жауапты азамат қалыптастырудың негізі.

Осындай кездесулер жас ұрпақтың құқықтық сауаттылығын арттырып қана қоймай, олардың бойында әділдік, парасаттылық, адалдық және заңға құрмет құндылықтарын нығайтуға ықпал етеді.

«Жастарды құқықтық тәрбиелеу – сыбайлас жемқорлыққа қарсы дүниетанымның негізі» жобасы аясындағы жұмыстар алдағы уақытта да жалғасын табады.

«ЖАҢАРУ» РҚБ Баспасөз қызметі