Ағымдағы жылдың 11 наурыз күні «ЖАҢАРУ» сыбайлас жемқорлыққа қарсы жалпыұлттық қозғалыс» РҚБ Жамбыл облыстық филиалы мен Тараз қаласы әкімдігінің ішкі саясат бөлімінің «Жастар ресурстық орталығы» КММ-нің ұйымдастыруымен Халық Қаһарманы, Кеңес одағының батыры Бауыржан Момышұлы атындағы дарынды ер балаларға арналған мамандандырылған әскери мектеп-интернатында «Заң мен тәртіп» қағидаты аясында білімгерлермен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» және «Адал қызмет – Отанға үлес» тақырыбында сұхбаттасу-кездесу өткізілді. Оған 60 білімгер кадеттер қатысты.
   Іс-шараның негізгі мақсаты – жастардың құқықтық сауаттылығын арттыру, заң талаптарын құрметтеу мәдениетін қалыптастыру, патриоттыққа тәрбиелеу, сондай-ақ сыбайлас жемқорлықтың, нашақорлықтың және интернеттік алаяқтықтың алдын алу жөнінде түсіндіру жұмыстарын жүргізу болды.
   Кездесуге арнайы сала мамандары қатысып, білімгерлермен өз тәжірибелерімен бөлісті. Атап айтқанда, «ЖАҢАРУ» сыбайлас жемқорлыққа қарсы жалпыұлттық қозғалысы» республикалық қоғамдық бірлестігінің Жамбыл облыстық филиалының төрағасы Қасымхан Естемесұлы Төлендиев сыбайлас жемқорлықтың қоғам дамуына тигізетін кері әсері туралы айтып, жастарды адалдық пен әділдік қағидаларын ұстануға шақырды.
   Сонымен қатар, Қазақстан Республикасы Мемлекеттік қызмет істері агенттігінің Жамбыл облысы бойынша департаменті Сыбайлас жемқорлықтың алдын алу басқармасының бас маманы Жылысбаев Ернар Нұрболұлы мемлекеттік қызмет саласындағы адалдық қағидалары мен сыбайлас жемқорлықтың алдын алу шаралары жөнінде ақпарат берді.
   Кездесу барысында Қазақстан Республикасы Бас прокуратурасының Құқықтық статистика және арнайы есепке алу жөніндегі комитеті Жамбыл облысы бойынша департаментінің прокуроры Сеитбекова Арманай Сагидуллаевна жастар арасында кең таралып отырған нашақорлық мәселесіне тоқталып, оның адам денсаулығына және қоғамға тигізетін зияны мен құқықтық салдары туралы баяндады.
   Сондай-ақ, аталған департаменттің прокуроры Дәуқараева Гүлдана қазіргі таңда жиі кездесетін интернеттік алаяқтық түрлері мен одан сақтану жолдары жөнінде түсіндіріп, жастарды ақпараттық қауіпсіздікке аса мән беруге шақырды.
   Кездесу барысында білімгерлер өздерін қызықтырған сұрақтарын қойып, мамандардан нақты жауаптар алды. Мұндай іс-шаралар жастардың құқықтық мәдениетін қалыптастыруға және қоғамдағы өзекті мәселелердің алдын алуға бағытталған маңызды шаралардың бірі болып табылады.