04 желтоқсан 2025жыл  «ЖАҢАРУ» РҚБ-гі өткізген «Жастарды құқықтық тәрбиелеу - сыбайлас жемқорлыққа қарсы дүниетанымның негізі» жобасы аясында жастар бастамалары байқауының жеңімпаздары анықталды. Жоспарлы іс-шара аралас форматында өтті.
   Жиналыста екі мәселе қозғалды: байқау жеңімпаздарын анықтау және жылдық қорытынды беру.
   Отырысты «ЖАҢАРУ» РҚБ-ің төрағасы – Мэлс Зайноллаұлы Семғалиев ашып, байқау  қатысушыларының 11-ден аса өңірден 43 өтінім бергенін хабарлап, сөзді әділқазыларға берді.      
   «Мен жастарға сенемін» деп Мағжан Жұмабаевтың өлеңімен бастаған Бейбіт Баймағамбетұлы Мамраев, қатысушылардың ішінен байқау жеңімпаздарын атады. Олардың еңбектеріне тоқталып, шығармасынан үзінді келтіріп, өз ойын білдірді.
   Байқау нәтижесінде жеңімпаздар Изенов Қуат Тілектесұлы, Вали Аяжан Ренатқызы - бірінші орынды, Боранбай Диляра Кендібайқызы, Нұрбайқызы Нұргүл – екінші орынды, Тургымбаева Жасмина Сайдуллақызы - үшінші орынды иеленіп, Куспан Дина Ерғалиқызы, Мұхам Ақбота Асқарқызы – ынталандыру марапатына ие болды.
   Әділқазылар алқасы атынан Мамраев Бейбіт Баймағамбетұлы қатысушы жастардың ойы, өмірлік ұстанымы дұрыс деп, бірауыздан бұл еңбектер сайтта жарық көретінін, жеңімпаздардан бөлек өзекті бірнеше еңбек алғыс хаттармен марапатталатынын айтты.
   Қатысушылардың қоғамның індеті – сыбайлас жемқорлық жайлы ойларының өзектілігі, өз еңбектерінде жастардың адалдық құндылықтарын нақтылауы, сыбайлас жемқорлық мәселесіне қатысты өзінің пікірі мен ұстанымы, мемлекет алдындағы жауапкершілік түсінігінің қалыптасқаны шығармаларынан айқын көрінеді.
    «Заң мен ар-ожданның ұштасқан тұсы – жемқорлықсыз қоғамның іргетасы. Бұл іргетастың өзегі – жастардың бойындағы жауапкершілік пен адалдық»; «Сыбайлас жемқорлықпен күрес — кез келген елдің тұрақты дамуының басты шарты. Әділдікке, ашықтыққа, адалдыққа негізделген қоғам ғана шынайы өркендей алады»; «Менің елімнің болашағы таза, әділ, сенімді қоғам құруда деп сенемін. Онда пара берудің орнына – еңбегімен жетістікке жететін, таныстың емес, қабілеттің бағаланатын, қорқыныштың емес, сенімнің үстемдік ететін қоғам болуы керек. Мен сондай елде өмір сүргім келеді, сондай елді бірге құруға дайынмын»; «Парамен келген пайда өткінші, ал адал еңбектің жемісі мәңгілік» деген жастар қоғам мен билік бірлесіп әрекет жасаса ғана, сыбайлас жемқорлық жойылатынына сенімді.
   Адалдық - әр азаматтың міндеті! Қоғамдық мүдде жеке мүддеден жоғары болу керек! Байқауға жіберілген эссе, мақала, плакат және бейнероликтер жастардың патриоттық сезімі мен сыбайлас жемқорлыққа қарсы мәдениетінің дұрыс қалыптасқанына дәлел. Шара соңында жоба жетекшісі жоба аясында өңірлер өткен іс-шараларға ат салысқандары үшін алғысын білдіріп, келесі жылы да жобаның жалғасатынын атап айтты.