ҚҰҚЫҚТЫ ЖАСТАР- ЕЛ БОЛАШАҒЫ

Алматы қаласы Назарбаев Зияткерлік мектебінде 9-12 жоғарғы сынып оқушыларына арналған кездесу - сұхбаттасу іс шарасы өтті. Алматы қаласы және Алматы облысы бойынша «Qazaqstannyn Halyq Batyrlary» РҚБ төрағасы, «ЖАНАРУ» Сыбайлас жемқорлыққа қарсы күрес» қоғамдық бірлестігі Алматы қалалық филиалының Кеңес мүшесі Мұрат Әбдішкуров және Ауған соғысының ардагері, жастармен патриоттық жұмыс комитетінің басшысы Минамжан Асимов оқушыларға әскери борыш, достық, өзара көмек және Отанға деген сүйіспеншілік туралы айтып берді.

«ЖАҢАРУ» сыбайлас жемқорлыққа қарсы жалпыұлттық қозғалыс» республикалық қоғамдық бірлестігінің жастардың құқықтық сауаттылығын арттыруға және сыбайлас жемқорлыққа қарсы тәрбиелеуге арналған жобаларының маңызы зор. Биыл «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты жобасын іске асырылуда. Мұндағы басты мақсат-өскелең ұрпақты қоғамның заңдары мен нормаларын бұлжытпай орындауға, құқықбұзушылықтың алдын алуға тәрбиелеу, құқықтық мәдениетті қалыптастыру, адалдық пен адамгершіліктің маңыздылығын түсіндіру.

Елімізде, әсіресе біздің өңірде ең өткір әрі күрделі әлеуметтік мәселе болып тұрған, ол жасөспірімдер арасындағы суицид. Жұртшылық мұның басты себебі - мектептегі буллинг, тұрмыс тауқыметі мен отбасындағы зорлық-зомбылық деп есептейді. Ата-ана бала үшін ең ұлы ұстаз. Сондықтан «Әкеге қарап ұл, шешеге қарап қыз өсер» дейді дана халқымыз. Баланың алған тәлім-тәрбиесі ата-ананың берген үлгі-өнегесіне тікелей байланысты екенін осыдан-ақ ұғуға болады.

 Енді ғана етек жеңін жинап, өмірге жаңа бейімделіп келе жатқан жасөспірімдерді теріс әрекеттерден қорғау - үлкендердің тікелей міндеті.

Спикерлер оқушыларға өзара көмек және Отанға деген сүйіспеншілік туралы айтып берді. Оқушылар тарапынан ардагерлерге өздерін қызықтырған сұрақтарын қойып, оларға жан-жақты жауаптар алды. Сұхбаттасу іс-шарасы өте тартымды, тағылымы мол, жылы достық жағдайда өтті.

«ЖАҢАРУ» БАСПАСӨЗ ҚЫЗМЕТІ