ЖАСТАРДЫҢ СЫБАЙЛАС ЖЕМҚОРЛЫҚҚА ҚАРСЫ МӘДЕНИЕТІН ҚАЛЫПТАСТЫРУ

   17 қазан күні Қарағанды индустриялық университетінде өкілетті органдардың қатысуымен сыбайлас жемқорлық пен құқық бұзушылықтардың алдын алу мәселелеріне арналған тренинг алаңы өтті. Іс-шара «Жастарды құқықтық тәрбиелеу — сыбайлас жемқорлыққа қарсы дүниетанымның негізі» жобасы аясында ұйымдастырылып, оның серіктестерінің бірі ретінде «ЖАҢАРУ»Сыбайлас жемқорлыққа қарсы жалпыұлттық қозғалыс» республикалық қоғамдық бірлестігі атсалысты.

    Іс-шара барысында студенттер күнделікті өмірде адалдық, жауапкершілік және әділеттілік мәселелерін жан-жақты талқылады. Жемқорлыққа қарсы мәдениетті қалыптастыру – яғни, адамның өмір сүру әрекетін ұйымдастыру, тәрбие мен білім беруде, тұлғаның бойында белгілі бір қасиетті дамытуға ықпал ету.

    Қатысушылар сыбайлас жемқорлыққа қарсы күрестегі әр азаматтың рөлін, заңға бағынудың маңызын және қоғамдық бақылаудың қажеттілігін атап өтті.

   Тренингтен кейін «Саналы ұрпақ» студенттер командасының қатысуымен интеллектуалдық ойын — брейн-ринг ұйымдастырылды. Қатысушылар өздерінің мол білімдерімен, логикалық ойлау қабілеттерімен және тапқырлықтарымен ерекшеленді. Ойын барысында қойылған сұрақтар білім, ғылым, адами құндылықтар және жастарды толғандыратын өзекті мәселелерді қамтыды. Жарыстың атмосферасы құрметке, өзара қолдауға және әділ күреске деген шынайы ниетке толы болды.

    Мұндай іс-шаралар студенттік ортада адалдық, жауапкершілік және әділеттілік сияқты басты құндылықтарды қалыптастыруға септігін тигізіп, болашақ мамандар мен саналы азаматтардың берік негізін қалайды. Сонымен қатар, жастар арасында сыбайлас жемқорлыққа қарсы мәдениетті нығайтуға бағытталған «ЖАҢАРУ» РҚБ-ның белсенді қолдауы жобаның табысты жүзеге асуына өз үлесін қосуда.

«ЖАҢАРУ» Баспасөз қызметі