“Жастарды құқықтық тәрбиелеу – сыбайлас жемқорлыққа қарсы дүниетанымның негізі” жобасы аясындағы сұхбаттасу семинар өтті.

9 қазан 2025ж. Ақтөбе қаласында “ЖАҢАРУ” Сыбайлас жемқорлыққа қарсы жалпыұлттық қозғалысы республикалық қоғамдық бірлестігінің Ақтөбе облыстық филиалы мен Жастар ресурстық орталығының мамандары бірлесіп, С.Байшев атындағы университеттің студенттерімен сұхбаттасу семинарын өткізді.

Сұхбаттасу семинары «Құқықтық сауаттылық – әділ қоғамның іргетасы: жастар арасында құқықбұзушылықтардың алдын алу» тақырыбында ұйымдастырылды.
Шараның басты мақсаты – жастар арасында адалдық пен сыбайлас жемқорлыққа қарсы мәдениетті қалыптастыру, құқықтық сананы арттыру және заңға деген құрмет сезімін дамыту.

Іс-шараға “ЖАҢАРУ” қозғалысының Ақтөбе облыстық филиалының мүшелері Ерлан Татимов, Серожатдин Барышев, Андрей Кудеев, Азиз Ажниязов, сондай-ақ облыстық прокуратураның қылмыстық қудалау бөлімінің аға прокуроры Жүсіп Жеңісұлы қатысты.

Жүсіп Жеңісұлы студенттерге есірткі заттарын қолданудың қауіптілігі, интернет арқылы таратылатын заңсыз әрекеттердің, соның ішінде есірткі заттарды таратушы болудың құқықтық салдары туралы кеңінен түсіндірді. Сонымен қатар, жастарға өз құқықтары мен міндеттерін білу, заңға бағыну және қоғам алдындағы жауапкершілікті сезіну – нағыз азаматтық мәдениеттің көрсеткіші екені айтылды.

Сұхбаттасу семинар барысында студенттер белсенділік танытып, өздерін толғандырған сұрақтарын қойып, мамандардан нақты жауаптар алды.
Талқылау ашық пікір алмасу форматында өтті.

Мұндай шаралар жастардың құқықтық сауаттылығын арттыруға, әділдік пен адалдық құндылықтарын бойына сіңіруге бағытталған.
Алдағы уақытта да “ЖАҢАРУ” қозғалысы мен Жастар ресурстық орталығы бірлесіп, жастар арасында құқықтық мәдениетті қалыптастыру бағытында түсіндіру жұмыстарын жалғастыруды жоспарлап отыр.

«ЖАҢАРУ» РҚБ Ақтөбе облыстық

филиалының баспасөз қызметі