18.07.2025

АРТЫНДА СҰРАУЫ БАР

Адалдық таразы өлшеуден, кісі ақысын жемеуден басталатыны белгілі. Жемқорлыққа жол ашатын түйткілдер, тәуекелдер жер жаһанды жайлап барады. Кейбір деректерге қарағанда, жекелеген мемлекеттерде ірі бизнестегі коррупция мемлекеттік қызметтегіден де асып кеткен. Қазір шағын, орта кәсіп иелерінің өздерін теріс жолға итермелеу тоқтамай тұр. Әрине, мемлекеттік қызметкермен ауыз жаласатын іскер адам лауазымды тұлға болып табылмайды. Сондықтан, қолдныстағы заң мұндай қылмысты ауыздықтай алмайды, қауқарсыз. Осыған орай БҰҰ Орталық Азияда бизнес адалдығы желісін (CABIN) қосты. Алматыда өткен "Адалдық — күнделікті іскерлік тәжірибедегі норма ретінде” атты арнайы конференцияда жемқорлықтың алдын алуға бағытталған бірқатар көкейкесті мәселелер көтерілген екен. Айталық, мемлекеттік мекемелер мен квазимемлекеттік сектор субьектілеріндегі комплаенс қызметінің рөлін күшейту жөнінде ұсыныстар әзірлемек. Ол үшін “Жаңару” жалпыұлттық қоғамдық бірлестігі еліміздегі комплаенс қызмет өкілдерімен, “Атамекен” Ұлттық кәсіпкерлер палатасы басшыларымен кездесуді жоспарлап отыр. Сондай-ақ, елімізде іскерлік этика нормаларын заңдастыру, бизнестің заманға лайық ашық, тұрақты ортасын құру маңызы артып келеді. Осыған байланысты “Жаңару” бірлестігі еліміздегі іскер азаматтардан, ынталы топтардан тиісті ұсыныстар күтеді.
Өйтпейінше, қоғамды жегідей жеп тауысатын жемқорлық індетінің алдын алу, тоқтату мүмкін емес.
Оны данышпан Абайдың өсиеті де растайды:

“Қулық, сұмдық, ұрлықпен мал жиналмас,
Сұм нәпсің үйір болса, тез тыйылмас.
Зиян шекпей қалмайсың. ондай істен,
Мал кетер, мазаң кетер, ар бұйырмас”.

Иә, әуелі ар-ұят бұйырсын. Бәрін көзімен көріп, құлағымен есітіп отырған халық қиялға берілмейді, баршаға бірдей заңға ғана сүйенеді. Шындығында, бұл - артында сұрауы бар күрделі мәселе. Ал, қоғамның сиқы, әзірге Сіз бен біз білетіндей.

«ЖАҢАРУ» РҚБ баспасөз қызметі