ЖЕМҚОРЛЫҚСЫЗ ҰРПАҚ: «ЖАҢАРУ» РЕСПУБЛИКАЛЫҚ ЖОБАНЫҢ ІСКЕ АСЫРЫЛУЫН ӨҢІРЛЕРМЕН ТАЛҚЫЛАДЫ

    Бүгін «ЖАҢАРУ» РҚБ-гі өңірлік филиалдарының қатысуымен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» республикалық жобасын аймақтарда іске қосу бойынша кеңес өтті. Жоба 17 өңірді, сондай-ақ Астана, Алматы және Шымкент қалаларын қамтиды.

    Бұл бастама аясында ювеналды полицияда есепте тұрған жасөспірімдермен, жастармен тікелей жұмыс жүргізетін 100-ден астам маман дайындалады деп күтілуде. Сонымен қатар, жастардың құқық бұзушылықтардың алдын алуға және сыбайлас жемқорлыққа қарсы мәдениетті қалыптастыруға бағытталған 15-ке жуық бастамасы қолдау табады.

    «Біздің күш-жігеріміз жоғары моральдық құндылықтарды ұстанатын ұрпақ қалыптастыруға бағытталған. Біз жастарды заңды құрметтеу мен өз әрекеттеріне жауапкершілікпен қарауға тәрбиелеу – болашақтағы жемқорлықсыз қоғамның кепілі деп сенеміз», — деді жоба жетекшісі Мэлс Семғалиев.

    Жоба Қазақстан Республикасының Мәдениет және ақпарат министрлігі мен «АБҚО» КеАҚ қолдауымен жүзеге асырылуда. Жоба 2027 жылдың соңына дейін жалғасады.

«ЖАҢАРУ» РҚБ баспасөз қызметі