2024 жылдың 18 сәуірі күні «Жастардың құқықтық сауаттылығын және жастардың құқық қорғау органдарына деген сенім деңгейін арттыру бойынша іс-шаралар кешенін өткізу»" атты әлеуметтік жобасы шеңберінде, жоба лекторы, «Әдеп» жобалық кеңсесінің жетекшісі, з.ғ.к. Е. Нұғыманов Астана қаласы, Полиция департаментінің Алматы аудандық полиция басқармасымен бірлесе отырып №5 студенттер үйінің кинотеатрында «Елорда аумағында нашақорлықтың алдын алудағы негізгі факторларды төмендету» тақырыбында кездесу ұйымдастырды.

   Кездесуге Астана қаласы, Полиция департаментінің Алматы аудандық полиция басқармасы бастығының орынбасары, полиция подполковнигі Е.Н. Аубакиров, студенттер үйінің педагог-ұйымдастырушылары және барлық студент жастар белсенділері қатысты.

   Кездесу диалог форматында өтті. Кездесуде з.ғ.к., Е. Нұғыманов нашақорлық мәселесі қазіргі таңда өзекті екеніне, жастар арасында нашақорлықтың алдын алу мәселелері жайында толыққанды мағлұмат берді. Сонымен қатар ол жастарды жаман әдеттерден аулақ болып, салауатты өмір салтын ұстануға шақырды.

   Сөз кезегін алған Астана қаласы Полиция департаментінің Алматы аудандық полиция басқармасы бастығының орынбасары, полиция подполковнигі Е.Н. Аубакиров видеоролик көрсетіп, 2023 жылғы ресми статистикаға сәйкес, елордада 14-34 жас аралығындағы жастардың саны 440 мыңды қамтитынын және статистика бойынша Қазақстанда психоактивті заттарды қолдану салдарынан динамикалық бақылауда 108 мыңнан астам адам есепте тұратын айтып, оның ішінде есірткіге тәуелді 18 243 адам бар екеніне тоқталды.

   Сонымен қатар ІІМ деректеріне сәйкес, биыл сотталғандар – 1200 адам, оның ішінде 800 адам есірткіге байланысты алғаш рет сотталғанын және синтетиканың 270-тен астам түрі табылғанын айтып өтті. Мысал ретінде мифидон, альфа, ПВП, МДМ, фентонил және т.б. адам жүйкесіне әсер ететін препараттарды мысал келтірді.

   Сонымен қатар есірткі, насывай тасымалдап, таратқаны, сатқаны үшін бас бостандығынан айыру жазасы көзделгенін студенттердің назарына салып, жаман әдеттерден ада болуды ескертті.

   Сөз соңында студенттер тарапынан сұрақтар қойылып, тұшымды жауаптар алынды.

“ЖАҢАРУ” РҚБ баспасөз қызметі