09.04.2024      2024 жылғы 09 сәуір күні Астана қаласында «ЖАҢАРУ» Сыбайлас жемқорлыққа қарсы жалпыұлттық қозғалыс» Республикалық қоғамдық бірлестігінің басшылығы Қазақстан Республикасы Мәдениет және ақпарат министрлігі Мәдениет комитетінің «Роза Бағланова атындағы «Қазақконцерт» мемлекеттік академиялық концерттік ұйымы» РМҚК ұжымымен кездесті.
    Іс-шараны «ЖАҢАРУ» РҚБ Орталық кеңсесі «Қазақконцерттің» комплаенс қызметімен бірлесіп ұйымдастырды.
    Кездесу шарасы «Жастардың құқықтық сауаттылығын және құқық қорғау органдарына сенім деңгейін арттыру іс-шаралар кешенін өткізу» атаулы әлеуметтік жобаның аясында өтті.
    Аталмыш Әлеуметтік Жобаны «ЖАҢАРУ» РҚБ Қазақстан Республикасы Мәдениет және ақпарат министрлігінің жанындағы «Азаматтық бастамаларды қолдау орталығы» Коммерциялық емес акционерлік қоғамның қолдауымен жүзеге асыруда.
    Жастар көшбасшылары мен медиа тұлғаларды, журналистерді, өнер адамдарын, кинематографистер мен жазушыларды Әлеуметтік Жобаны іске асыруға тарту, сыбайлас жемқорлыққа қарсы іс-қимыл жөніндегі мемлекеттік саясаттың қағидаттарын насихаттау, жастардың құқықтық сауаттылығын арттыру жөніндегі мемлекеттік саясаттың ережелерін түсіндіру кездесудің мақсаттары болып табылады.
    Кездесуді «ЖАҢАРУ» РҚБ Төрағасы СЕМҒАЛИЕВ Мэлс Зайноллаұлы жүргізіп отырды.  
    Іс-шараны алғы сөзбен «Қазақконцерт» ұйымының директоры Таир Нұрланұлы Қаратаев ашып берді.
    Кездесу барысында «ЖАҢАРУ» РҚБ төрағасы Мэлс Зайноллаұлы СЕМҒАЛИЕВ сөз алып, қазіргі еліміздегі батыс, солтүстік өңірлердегі топан су басып жатқан төтенше жағдайға тоқталып, өңірлердегі «ЖАҢАРУ» РҚБ бірлестігі белсенділерінің тарапынан Президентіміздің үндеуін қолдап жатқандығын атап өтті.
    Жиналыста келесі тұлғалар сөз сөйлеп, өз пікірлерімен бөлісті.
    Пікір талас аясында, Қазақстан Республикасының мемлекеттік және қоғам қайраткері Оралбай Әбдікәрімұлы ӘБДІКӘРІМОВ, «ЖАҢАРУ» РҚБ Төрағасының орынбасары, Астана қалалық филиалының Директоры, ҚР Прокуратурасының құрметті қызметкері Дәулеткерей Рахметоллаұлы РАХМЕТУЛЛИН сөз алып, озық ойлы елдің ұстанымы болып табылатын «Адал адам – Адал еңбек – Адал табыс» қағидаттарын, құқықтық сауаттылықты, ұлттық құндылықтарды дәріптеу бойынша өз ұсыныс, ой пікірлерімен бөлісті.
    Қазақстан Республикасының мемлекеттік және қоғам қайраткері, Қазақстан Журналистика академиясының академигі МЫҢБАЙ Дархан Қамзабекұлы өз сөзінде талантты жандардың да пендешілікке салынып, заңды бұзатындары кездесетіндігінің жасырын еместігін атап өтті. Өнер адамы – халық адамы. Оның жүріп-тұрғаны, қоғамдық орындағы мінез-құлқы елге өнеге болуға тиіс. Әлбетте, өзін сауатты, зиялы санайтын саналы азамат қоғамды жат қылықтардан тазартуға атсалысады. Ал, заңсыз жолмен табыс табудың, салық төлеуден жалтарудың соңы тұтылуға әкеліп соқтырады. Бүгінгі таңда талғамы жоғары көрермен қойылымның жоғары сапасын талап етеді. Репертуар түзгенде қоғамдағы көкейкесті тақырыптарды ұмытпаған жөн екендігін тілге тиек етті.
     ТІЛЕПБЕРДИЕВ Ерғожа Әлғожаұлы, «Қазақконцерттің» комплаенс қызметкері өз сөзінде «Қазақконцертте» сыбайлас жемқорлыққа қарсы жүргізіліп жатқан іс-шаралар туралы айтып берді.
     «Қазақконцерттің» Дәстүрлі ән орталығының жетекшісі НАУРЫЗБАЙҰЛЫ Жасұлан концерттік ұйымды сахналық костюмдермен, заманауи дыбыстық құрал-жабдықтармен қамтамасыз етудегі шалағайлықтар төңірегінде әңгіме қозғады.
     «Қазақконцерт» ұйымының құжатпен қамтамасыз ету бөлімінің басшысы Гүлфира Әбдіқызы ӘБДІКӘРІМОВА өткізіліп отырған шараға оң баға беріп, қазіргі күндері осындай тақырыпта жастар арасында жиі өткізілу керектігін атап өтті.
     Жиналыстың соңына қарай сұрақ-жауап түрінде пікір алмасу өтті.
     Жиынның ашықтығы мен мазмұны шығармашыл қауымға, әсіресе жастарға ой салғандай әсер қалдырды.
    Кездесу соңында қатысушылар арасында жоғарыда көрсетілген әлеуметтік жоба туралы сауалнама жүргізіліп, буклеттер мен флаерлер таратылды.

 

«ЖАҢАРУ» РҚБ Баспасөз қызметі